Foto: Aýyl sharýashylyǵy mınıstrligi
Prezıdent Is Basqarmasyna qarasty «Astana 20» memlekettik qorynyń belsendi qoldaýymen sapaly kóshet materıalyn ósirý jumystary júrgizilip jatyr, kóshet materıaly – bolashaqta «Aport» sortyn otyrǵyzatyn jańa baqtardyń negizine aınalmaq.
2024 jyly Jońǵar Alataýynyń taýly aımaqtarynan Sıvers jabaıy almasynyń tuqymdary jınalyp, olar sebilip, kóshet pıtomnıgi qurylǵan. 2025 jylǵy aqpanda sapaly kóshetter daıyndaý maqsatynda 10 gektar alqapta qysqy kóztańba (okýlırovka) jumystary júrgizilgen.
Aýyl sharýashylyǵy mınıstrliginiń baspasóz qyzmetiniń málimdeýinshe vedomstvo ókilderiniń Almaty oblysyna jumys sapary Aýyl sharýashylyǵy vıse-mınıstri Azat Sultanovtyń tóraǵalyǵymen ótkizilgen keńespen aıaqtaldy. Keńeske salalyq qurylymdar men ǵylymı qaýymdastyq ókilderi qatysyp, Qazaq jemis-kókónis sharýashylyǵy ǵylymı-zertteý ınstıtýtynyń «Talǵar» óńirlik fılıaly basshysynyń esebi tyńdaldy. Sonymen qatar jobany iske asyrýǵa kedergi keltirip otyrǵan máseleler talqylanyp, olardy sheshýdiń naqty joldary aıqyndalǵan. Tıisti qurylymdarǵa naqty tapsyrmalar berildi.
Aıta ketelik, 2027 jyldyń sońyna deıin 110 gektar baq otyrǵyzý kózdelip otyr.
Sonymen qatar, «Aport» almasyn ulttyq brend retinde keńinen nasıhattaý jumystary júrgizilip jatyr. Naqty ataǵanda, bıyl qyrkúıekte Qazaq jemis-kókónis sharýashylyǵy ǵylymı-zertteý ınstıtýtynyń pomologııalyq baǵy bazasynda «Baq kúni» sharasy ótedi.
Sala mınıstrligi tarapynan Jol kartasyn iske asyrý sheńberinde jobanyń ǵylymı negizi men sabaqtastyǵyn jáne ornyqty damýyn qamtamasyz etý jalǵasa bermek.
